மிதந்து செல்வதற்க்கான நீர் வெளி

கோப்பையில் தளும்புகிறது


நீங்கள் மிதந்து செல்வதற்க்கான நீர் வெளி

குப்பியிலிருந்துகோப்பைக்கு ஊற்றி

அதன் மணத்தை உங்கள் நாசிக்கு ஏற்றுகிறீர்கள்



எதிரில் இல்லாத ஒருவருடன்

சியர்ஸ் சொல்லி அருந்தும்

முதல் துளி வாளின் கூர்மையை

உள்ளே பாய்ச்சுகிறது

பிறகு அடுத்தடுத்துத் துளிகள்

உங்களை மழையில் நனைக்கிறது



மழைத்துளி விழுந்த மண் எழுப்பும்

மெல்லிய வெப்பம் உங்கள் உடலிலும் பரவுகிறது

பிறகு மெளனத்திலிருந்து

ஒரு நாக்கு நீண்டு உங்களுடன் உரையாடும்



மது ஒரு மனசிலக்கி

திடமானவர்களை மிருதுவாக்கிறது

தவிப்பின் மனிதர்களுக்கு சாந்தமளிக்கிறது

செய்யாத தவறுக்கும் மன்னிப்பு கேட்கிறது

எளிதில் திறக்காதக்கதவுகளை திறந்து வைக்கிறது



ஒளிந்து பிடிக்கும் இவ்வுலக வாழ்வில்

உங்களை நீங்களேகண்டுபிடிக்க உதவுகிறது



குளிர்ந்த திரவத்தில் நீங்கள் குஞ்சு மீனாகலாம்.

தாயின் மடிநினைந்து தலை சாய்க்கலாம் .

அளவான மது அரு மருந்து அறிக .